Published: 19-10-2024
معروف کوریوگرافر ریمو ڈی سوزا اور ان کی اہلیہ لیزل ڈی سوزا کے خلاف مہاراشٹر میں 11 کروڑ 96 لاکھ روپے سے زائد کی دھوکا دہی کے الزام میں مقدمہ درج کر لیا گیا ہے۔بھارتی میڈیا کے مطابق ممبئی میں ریمو، ان کی اہلیہ اور دیگر پانچ افراد کے خلاف پولیس نے مقدمہ درج کیا ہے۔یہ مقدمہ ایک 26 سالہ ڈانسر کی شکایت پر 16 اکتوبر کو میرا روڈ پولیس اسٹیشن میں درج کیا گیا۔ شکایت کے مطابق ریمو، لیزل اور دیگر افراد نے 2018 سے جولائی 2024 تک ایک ڈانس گروپ کیساتھ دھوکا کیا۔ گروپ نے ایک ٹیلی ویژن شو میں پرفارم کیا اور جیتا لیکن ملزمان نے گروپ کو اپنا ظاہر کرتے ہوئے انعامی رقم 11 کروڑ 96 لاکھ روپے سے زائد کی رقم ہڑپ لی۔ پولیس کے مطابق دیگر ملزمان میں اوم پرکاش شنکر چوہان، روہت جادھو، فریم پروڈکشن کمپنی، ونود راوت اور ایک پولیس اہلکار رمیش گپتا شامل ہیں۔ پولیس اس معاملے کی مزید تحقیقات کر رہی ہے۔ریمو ڈی سوزا پچھلے 15 سال سے ڈانس ریئلٹی شوز میں جج کے طور پر خدمات انجام دے رہے ہیں۔ انہوں نے "ڈانس انڈیا ڈانس"، "جھلک دکھلا جا"، "ڈانس پلس" اور "انڈیاز بیسٹ ڈانسر" جیسے مقبول شوز میں جج کے فرائض سرانجام دیے۔ریمو جلد ہی اپنی فلم "بی ہیپی" کے ریلیز کی تیاری کر رہے ہیں، جس میں ابھیشیک بچن اور عنایت ورما نے اہم کردار ادا کیے ہیں۔ یہ فلم ایک سنگل والد اور اس کی بیٹی کی کہانی بیان کرتی ہے۔
